我唔認為梅艷芳可以代表香港精神，佢亦唔係咩香港女兒，佢係不折不扣嘅一個身世可憐嘅歌姬，所以話佢喺如花嘅化身，會說服她多。
佢身世點可憐，基本上可以上網就知道晒，屬於八九十年代嘅人可能更加瞭如指掌。據聞當年黎小田特登去啲酒廊歌廳搵啲有潛質嘅人去參加新秀，就喺咁樣搵到梅艷芳，發現佢把聲喺因為唱得太多而令聲帶受損，咁樣先令把聲帶有獨特嘅磁性。佢幾歲人仔比個無良阿媽操控去唱歌賺錢，令佢只有企喺個台度先有自信，情況有啲似MJ，MJ曾私下跟一個朋友講，佢好寂寞，梅艷芳更喺演唱會上面表示自己只得哥哥一個朋友，一生只想搵真愛又遇上近藤真彥呢個渣男，咁樣嘅香港女兒同一代歌后，我諗佢寧願唔做。
無疑梅艷芳確實喺香港嘅一代歌姬，喺台上一舉手一投足，好似同你講：Hey guys,look atme，講台我玩晒！就算到宜家，都冇第二個有呢類舞台魅力。佢嘅歌聲同台風喺剛柔並重，佢喺真正演繹緊首歌，仲喺入晒骨嗰隻，而唔喺單單唱出泥，呢樣嘢香港只有哥哥能夠做到，所以佢兩個喺芳華絕代，冇得講。
佢唱兒歌變小雲，唱小調變如花，唱快歌變妖女，百變嘅唔喺佢個look，而喺佢把聲。所以翻唱佢歌嘅人，十之八九都會喺一場災難，翻做佢人生嘅戲，都自然喺一場災難。
無論有幾多人撐呢套戲，都掩飾唔到一樣嘢，就喺呢套喺向梅艷芳歌功頌德嘅折子戲，而唔喺人物傳奇，更加唔喺黃子華口中嘅史戲底巨作。都唔好話冇民主歌聲獻中華場面，連梅媽都冇影，咁即喺唔喺想講佢嘅人生，只喺想講一個被娛樂圈塑造嘅舞台明星，仲要喺明星嘅一部分。正如英國殿堂級演員伊恩·麥基倫爵士喺佢自己嘅紀錄片所講，演自己喺最難，演員喺飾演人地嘅某部分，咁樣容易好多。《梅艷芳》就喺一套搵個演員扮演梅艷芳某部分，或者喺某部分嘅梅艷芳，而唔喺重現真實嘅梅艷芳。
講番轉頭，我中意梅艷芳啲side track，’oh no,oh yes.’（改編中心明菜歌）、來來星屑巷、教父的女人呢啲都好襟聽，聽呢啲歌就會明白咩叫歌手將靈魂灌注入首歌裡面。
PS:我覺得梅艷芳最正嘅現場演出，無獨有偶，都喺同哥哥同台嘅，一場喺Jam冰山大火，一場喺芳華絕代同緣份。
Comments